ریاست جمهوری تاجیکستان به مناسبت سیوپنجمین سالگرد استقلال این کشور، نشستی با عنوان «تاجیکستان مستقل؛ پیوندگر تمدن آریایی» را در شهر دوشنبه برگزار کرد.
در این نشست که روز دوشنبه، ۱۶ سنبله، برگزار شد، پژوهشگران و چهرههای فرهنگی از دستکم ۲۷ کشور به شمول محییالدین مهدی، نماینده پیشین مجلس و پژوهشگر شرکت کرده بودند.
امامعلی رحمان، رییس جمهور تاجیکستان در این نشست گفته است که با افزایش رقابت میان هویتها، زبانها، ارزشها و منافع در جهان، همبستهگی فرهنگی و معنوی فارسیزبانان اهمیت بیشتری یافته است.
کاخ ریاست جمهوری تاجیکستان گفته است که این نشست علمی و فرهنگی از سوی انجمن بینالمللی «پیوند» به رهبری امامعلی رحمان برگزار شده و حدود ۲۳۰ مهمان داخلی و خارجی در آن شرکت کرده بودند.
رحمان در سخنرانی خود گفته که انجمن بینالمللی «پیوند» در سالهای گذشته به عرصهای برای گردهمایی تاجیکان و فارسیزبانان جهان تبدیل شده است.
او در این نشست از طرح ساخت «کاخ تمدن آریایی» و «مرکز بینالمللی نوروز» در شهر دوشنبه نیز خبر داده و گفته که کاخ تمدن آریایی قرار است به یک مرکز فرهنگی، علمی و آموزشی تبدیل شود.
رییس جمهور تاجیکستان همچنان مرکز بینالمللی نوروز را فرصتی برای معرفی نوروز بهعنوان فلسفه زندهگی، صلح و نوزایی و تقویت جایگاه تاجیکستان در زمینه گفتوگوی تمدنها دانسته است.
امامعلی رحمان زبان را بنیاد هستی معنوی ملت خوانده و گفته است که انجمن «پیوند» باید در حفظ، گرامیداشت و گسترش زبان نقش محوری داشته باشد.
او تاکید کرده است که زبان باید به زبانی قدرتمند در عرصههای علم، فناوری، اقتصاد و دیپلماسی تبدیل شود.
محیالدین مهدی در این نشست گفته که دستاوردهای تاجیکستان برای تاجیکان و تمدن فارسی عظیم و چشمگیر بوده است.
او از سیاستهای طالبان در برابر فارسیزبانان انتقاد کرده و بر بهرسمیتشناختن هویت، زبان، فرهنگ و حقوق همه اقوام افغانستان و مشارکت عادلانه آنان در اداره کشور تأکید کرده است.
مهدی همچنین از نقش امامعلی رحمان در بازگشت صلح و امنیت به این کشور ستایش کرده و به نقش برهانالدین ربانی، رییس جمهور پیشین افغانستان و احمدشاه مسعود در روند صلح تاجیکستان اشاره کرده است.
او در این نشست پیشنهاد کرده است که در دانشگاههای کشورهای فارسیزبان، مراکزی برای مطالعه تاریخ، فرهنگ و گویشهای تاجیکان افغانستان و تاجیکستان ایجاد شود.
تاسیس تلویزیونی با نام «تاجیکان» یا «پارسیان» و ایجاد سازمانی برای تقویت همگرایی میان کشورهای فارسیزبان نیز از دیگر پیشنهادهای او در این نشست بوده است.
