وزارت امور خارجه تاجیکستان در واکنش به رویدادهای اخیر در امتداد مرز این کشور با افغانستان، به طالبان یادداشت اعتراضی فرستاده و خواهان رعایت حاکمیت و مصونیت مرزی تاجیکستان شده است.
بر اساس گزارش آسیا پلاس، دوشنبه روز جمعه، ۲۳ اسد، در این یادداشت نسبت به آنچه «نقض حریم هوایی» تاجیکستان، آسیب‌رسیدن به خانه‌های مسکونی و کشته‌شدن یک غیرنظامی در ناحیه درواز خوانده شده، اعتراض شدید خود را به طالبان اعلام کرده است.
وزارت خارجه تاجیکستان از طالبان خواسته است این رویداد را جدی بررسی کرده و برای جلوگیری از تکرار موارد مشابه، اقدامات عملی انجام دهد.
مقام‌های تاجیکستان گفته‌اند که تشدید درگیری‌های مسلحانه در بخش‌هایی از بدخشان افغانستان، نگرانی‌های امنیتی را در مناطق مرزی این کشور افزایش داده است.
به گفته وزارت خارجه تاجیکستان، ادامه این درگیری‌ها می‌تواند پیامدهایی برای امنیت مناطق مرزی داشته باشد و با اصول و قوانین بین‌المللی در تضاد قرار گیرد.
با این حال، مقام‌های تاجیکستان جزییات بیشتری درباره چگونه‌گی نقض حریم هوایی این کشور یا میزان خسارت واردشده به خانه‌های مسکونی ارایه نکرده‌اند.
این در حالی است که دفتر ریاست جمهوری تاجیکستان پیشتر اعلام کرده بود که در پی تیراندازی افراد مسلح از خاک افغانستان، یک زن در ناحیه درواز کشته شده است.
آسیا پلاس گزارش داده که قربانی یک زن جوان و باردار بوده و یک کودک خردسال از او باقی مانده است.
امام‌علی رحمان، رییس جمهور تاجیکستان با خانواده این زن ابراز همدردی کرده و به مقام‌های محلی دستور داده است برای رسیده‌گی به وضعیت خانواده او اقدامات لازم را انجام دهند.
گفتنی است که در روزهای اخیر درگیری میان نیروهای طالبان و افراد زیر فرماندهی جمعه‌خان فاتح در بخش‌هایی از بدخشان ادامه داشته است.
