حضور بانوان شطرنج‌باز افغانستان در رقابت‌های بین‌المللی جام ریاست‌جمهوری تاجیکستان

نویسنده:

شماری از بانوان شطرنج‌باز افغانستان در دومین دور رقابت‌های بین‌المللی شطرنج جام ریاست‌جمهوری تاجیکستان اشتراک کرده‌اند؛ رقابت‌هایی که با حضور ورزشکاران و نمایندگان کشورهای مختلف جهان در شهر دوشنبه، پایتخت این کشور آغاز شده است.

ظاهر اغبر، سفیر افغانستان در تاجیکستان روز سه‌شنبه، ۱۹ عقرب، در برگه فیسبوک نوشته است که بانوان شطرنج‌باز کشور به سرپرستی ملالی سنگین، اتشه فرهنگی سفارت افغانستان در دوشنبه در این رقابت‌ها حضور دارند.

این مسابقات تا ۱۷ نوامبر سال جاری ادامه خواهد یافت و ورزشکاران کشورهای مختلف در آن با یکدیگر رقابت می‌کنند.

حضور زنان افغانستان در این رویداد ورزشی در حالی صورت می‌گیرد که فعالیت‌های شطرنج در داخل کشور با محدودیت و توقف روبه‌رو شده است.

طالبان شطرنج را خلاف آموزه‌های اسلامی خوانده و فعالیت در این رشته را ممنوع اعلام کرده‌اند.

اشتراک بانوان شطرنج‌باز افغانستان در این رقابت‌ها، فرصتی برای نمایش استعدادها و توانایی‌های ورزشی زنان کشور در سطح بین‌المللی فراهم کرده است؛ آن‌هم در شرایطی که زنان در داخل افغانستان با محدودیت‌های گسترده در زمینه فعالیت‌های ورزشی و حضور در رقابت‌های رسمی مواجه‌اند.

این حضور بار دیگر وضعیت ورزش زنان افغانستان و محدودشدن فرصت‌های آنان برای تمرین، رقابت و رشد حرفه‌ای در داخل کشور را برجسته می‌سازد.

در میان بگذارید.