محمداسحاق دار، معاون نخست‌وزیر و وزیر امور خارجه پاکستان برای رهبری هیات این کشور در نشست شورای رییسان حکومت سازمان همکاری شانگهای، عازم شهر دوشنبه، پایتخت تاجیکستان شده است.
وزارت امور خارجه پاکستان روز دوشنبه، ۲۷ میزان، اعلام کرده است که اسحاق دار در جریان این سفر، علاوه بر اشتراک در نشست اصلی، با رهبران تاجیکستان و همتایان خود از کشورهای عضو سازمان همکاری شانگهای نیز دیدار خواهد کرد.
این نشست قرار است روزهای ۱۹ و ۲۰ اکتوبر ۲۰۲۶ برگزار شود.
سازمان همکاری شانگهای در سال ۲۰۰۱ تاسیس شده و یکی از چارچوب‌های مهم همکاری چندجانبه در منطقه اوراسیا به شمار می‌رود.
این سازمان در زمینه‌های امنیتی، اقتصادی، تجاری، ترانزیتی و فرهنگی فعالیت می‌کند و اعضای آن برای گسترش روابط و هماهنگی در مسائل مشترک منطقه‌ای با یکدیگر همکاری دارند.
نشست دوشنبه فرصتی برای کشورهای عضو فراهم می‌کند تا درباره گسترش تجارت و سرمایه‌گذاری، توسعه راه‌های ترانزیتی، تقویت ارتباطات منطقه‌ای و همکاری‌های اقتصادی گفت‌وگو کنند.
